WEST BENGAL INTHLAN BEHBAWM TITI

WEST BENGAL INTHLAN BEHBAWM TITI



May ni 4 khan tun hnaia Inthlan boruak ngaihnawm ber pawl West Bengal leh India ram state dang Tamil Nadu, Assam, Puducherry leh Keralam te an inthlang a. An zingah hian West Bengal hi a ngaihnawm zual riauin a hriat a, a chhan pawh India ram khawpui hlun Kolkata awmna niin, opposition role hneh taka parliament lama lantirtu party lian tak an ni bawk a, BJP tan an huatawm hlein a rinawm. Kum 15 tel tehmeuh mai WB hi Trinamool Congress (TMC) hian an lo awp tawh a, luh chilh tumin National Party lian ten an veh reng a, mahse, an thei mawlh lo, an zungah an chiang a, an ngaih dan leh pawm dan piah lama nek an har hle, an principle a nghet pawh kan tithei awm e.

Assembly Constituency 294 atangin 293-ah inthlanna neih tawh niin, BJP hian 207-ah ro an rel ta a, All India Trinamool Congress hian seat 80 an nei pha awrh tawh a, INC lamin seat 2, AJUP in seat 2, CPI(M) seat 1 leh AISF seat 1 te an dinhmun a ni.

Chutiang taka hnam tam ber, Bengali mipui atanga zi chhuak political party chauh tia an sahuai thing vawn tlat laiin tun tum zet zawng BJP a siruk lain an thawk a, dan zawh rual an ni tawh lo a ni e; a tum khat nan WB ah BJP an lut ta nge nge. CM Mamata Banerjee meuh pawh a tal buai hle a, vote chhiar lai tihbuai tum ni awm takin counting hall lamah a tlan phei nasa hle a, vawiin thlengin a press conference-ah chuan chak zawk a la inti a, a lo kir leh vat tur thu te, Lok Bhavan lama kal leh resign a tum loh thu a tlangaupui piap piap bawk. Chubakah - nem, tlawh leh tharum hmanga beih niin a insawi bawk.

Ka Tawnhriat Atangin

Nikum khan ka US Visa buaipui leh thil eng eng emaw avangin Kolkata ka zin ngun ve hle a. Ka zin apiang hian Taxi, Auto leh Uber ka hman thin driver te hi ka phak tawkin ka titipui nasa ve thin a. Ka thiante ka kawm kual bakah, an Political Party office lian zawng zawng chu ka tlawh kimin, an hruaitute pawh ka titipui deuh vek awm e. Chu vang chuan fair taka inthlan an hmachhawn a nih chuan Trinamool lam tan a thlaphanawm hle tih kha ka hmu lawk ve deuh a, Taxi driver ten Mamata leh a pawlte laka an lawm lohna an sawina video/audio record te pawh ka la nei thlap a ni; an ngaina viau tlat lo!

Keima mimal tak pawha ka ngainat viau loh chhan pakhat ka cham chhung khan a awm a, chu chu nikum a rally tur inbuatsaih ata tawh Kolkata ka awm lai a ni a, state Police leh sorkar hnathawkte kha an Party TMC tan khan worker tih awm tak tak tiin an phe suau suau mai a, Rally hma ni fe atangin helama kan political party thalai pawlte hnatlanna awmah an buai hle te, an party headquarters office lamah ni se state police gate atangin an duty vek te kha a mak ka ti tak zet a ni. Mizoramah ni se kan sel nasat turzia te ka ngaihtuah a. Ka thianpa Ushinor, BBC lamah te pawh lo thawk tawh bulah khan ka sawi nghe nghe a, ani pawhin TMC that lohna lian tak a nih thu a sawi zui ve nghe nghe. Chuvangin Modi-Shah ten, “Banerjee chuan state police te dik lo takin a hmang a, inthlanah pawh Central Security personnel 2.5 lakh vel tirh luh a tul a ni,” an tih hi a awm ka ti ve deuhreuh tlat nia.

Banerjee An Ngaina Lo

Kum 2020 daih tawh khan Amit Shah chuan Mamata nephew Abhishek Banerjee, Diamond Harbour MP ni bawk chu Rajkumar (lal fapa) tiin a lo sawi tawh a; “CM dawt leh tur chu he rama pianga sei lian (bhumi putra) leh mipui zing atanga lo zi chhuak a ni tur a ni, lal fapa ni loin,” a lo ti tawh a. Abhishek-a chu MBA crorepati, a hausakna rinhlelhawm leh mipui harsatna hre thiam loah a chhuah daih tawh a ni. TMC lam hi Modi leh a party te sakhua tih bik neia Minority te tana hlauhawm an ni titu lian ber pawl an ni a, BJP lam pawh hian an bei let nasa ve hle reng a, an future tur mihringte thlengin an zuah bik hauh lo. Abhishek hi kum 30 ral a kai dek dek atang tawhin a crorepati nghal der tawh a, a hausakna hi miten mak an ti fo reng a, Income tax lamin vawi khat pawh an raid lo te chu mi mak tih a hlawh lehzual a, a sum deh chhuah dan lah rawva leh huaisar taka sum dik lo taka thawk chhuaktu berah puh a ni nasa hle a, CPI(M) member pakhat sawi dan phei chuan, “Abhishek-a BJP in hetianga an puh apiangin Mamata-i chak lohna lian ber a ni a, BJP a beihna a nep phah sawt zel,” a ti nghe nghe.

Mamata Banerjee ngei pawh kum 2011 kuma a thupui “Change” leh “Mother, earth, mankind” tithe kha a kalsan thui deuh tawh em ni tih a ngaihtuah theih viau. Kum 34 zet Left ho awpna hnuaia hmasawnna lian tham nei inti loa an awm tak avangin an Didi lakah hian beiseina an nei sang em em bawk a. Chhungkaw background ropui leh puitu tha nei hauh loin amaha rawn inhai chhuak a, heti taka mite ngaihzawn rawn ni tura a beih nasat turzia ngaihtuah hi chuan fakawm tak a ni thung. A tihsual lian ber erawh a tiam anga ‘change’ a thlentir lo kha a ni ber mai. Left ho chakna atana puitu lian ber ber thiltithei tak tak te, football club leh khawtlanga committee pawimawh tak takte chu a chakna hnar leh a thian thate an lo ni chho a, mahse, anni tih lawm reng hi hautak leh ram hmasawn lohna hmawr, Marxist lam thanmawhbawk tho kha a ni a, a hnua amah dotu lian an ni zui reng a.

Didi hi kan la ngai viau maithei

Kum 2011 inthlan zet kha chu a pui teh e, Didi character kha a va hlawhtlinpui chiang em! An sawi dan takah, “Mamata hi chu i laizawn upa zawk angin i tan a ding reng thei ang a, a tul phawt chuan a nunna pawh a hlan ngam a ni,” an lo ti thin, Congress party-a a awmlai ata tawh Left ho hmalakna duh lohna protest lamah hliam na tak tak a lo tuar tawh a, nu huaisen leh hlauh nei lo a nihna chu a larpui a ni. A chappal var, a hrui pawl lam a bun a, simple taka a inchei pawh hian a confi in, a huai em em reng a, mi zawng zawng tan unaunu upa zawk ‘Didi’ nihna neitu nia inchhalin an tan a au nasa a, 2011 khan hneh takin a tling reng a nih kha.

Grassroot leadership quality tha tak a neih bakah hmeichhia leh retheite tan welfare tha tak tak chu a siam ve viauin a lang a, chung zawng aia India ram tan a hlutna chu Hindu communalism laka hel ngam leh RSS thlenga do ngam ber CM a nihna hi keini minority te tan chuan a ngaihawm ve hle maithei. Central sorkar lak atangin an hnam leh ram nihna (regional identity) te humhim a nih theih nan a huaisen hle a, Federalism ziarang humhimtu lian tak niin a sawi theih awm e. Sorkar laipui rorelna ang ang lo chhawm ve mai chu him lo tein a hria a, ‘Bengali pride’ dik tak chawi vawngin, ama zarah state dang hruaitute pawhin mahni hnam nihna leh chin dante humhim turin aw an chhuah nasat ngam phah hlein a rinawm. TMC MP te, a bikin Mahua Moitra hi Parliament thut khawmnaah pawh an huaisenin, sakhaw zalenna tur atan tea au nasa ber pawl an ni tih kan hriat theuh ka ring.

TMC hi tun tumah zet zawng BJP in paih thlak ngei ngei tumin an thuam famkim nen an bei a, TMC politicians Income Tax hmang ten an bei a, Special Intensive Revision (SIR) hmangin mi 90,83,345 hming lai voter list atangin an delete bawk a, chung chu a tam ber Muslim leh TMC supporters an ni. He inthlan lo awm tur pual hian sum pawh BJP lam hian an seng hnem ngawt ang, Hindustan Times April 28 tar lan danin 31.57 crore lai mai google leh meta lama advertisement tih nan chauh pawh zuk seng hem a mawle! Social media power hi an hre chiang a, chuta invest chu an hreh lo tak zet a ni. BJP lam hian an campaign speech hman thiam ngai hmangin Hindu vote hlawm tha tak hmuh tumin an rawn bei chat a, Muslim candidate tun tumah hian an nei duh hauh lo a, Congress in Muslim candidate ngah berin 78 lai an nei a, TMC lamin 47 neiin Muslim vote darhsarh nuai hi BJP chakna hnar pakhat a ni bawk.

A tak ram hi a pawimawh miau si a

Tun hnai inthlan reng rengah BJP hian hma an sawn nasa hle a, Banerjee chakna hnar hmeichhe vote pawh TMC leh Left lamin an insem thin a ni a, BJP lamah an kal duak duak mai. Kan rama kan sawi chhoh mek thalai hna nei lo, hna vang hrim hrim buaina hi a lian tak zet a ni. Hemi chungchang sawi phei chuan Mizoram House-a receptionist sap tawng thiam ve deuh pa tir te khu ka hre chhuak thin, mittui tla chunga an chhungkaw dinhmun min hrilh lai te kha. Hna dang a vang si, nupui fanau chawmna khawp WB a hmuh a harzia a sawi nasa ve hle a, risk lain sorkar hna alawm tiin Mizoram House a rawn thlang a, ngheh ni an nei ve meuh si lo, a harsa ve hle a ni.

Chutih rualin corruption a nasa hle a nih hmel bawk; hna lak ni khua, a bikin zirtirtu phei chu duhsak zawng an titling deuh zel niin an sawi a, sorkar hna fair taka lak a awm meuh loin an sawi. TMC lam hian kan sawi tak ang khan sum hi extortion hmanga an lak luh nasat avang hian middle class leh thalai zawkte an tithinur ve hle bawk a. Merit aiin politician hmelhriat nih a hlut chhoh tak zelna te chu thalai huat zawng tak a ni.

RG Kar Medical College lama pawngsual case mawlh kha a pawi tak zet; thil tisualtu local goons te veng him titih leh hrem ngam loa sorkar a khawsakna khan mipui rinna a tibo nasa lehzual hle a. Heng ‘goons’ leh ‘musclemen’ an tihho mai te thian tha tak sorkar ni a, tharum leh invauna hmanga media leh mipui thunun tlatna hi Trinamool lamin an huat em em thin, mahse, Left ho ai maha tun hnua nasa zawka an chhawm a ni.

Banerjee innghahna lian tak chu a sawisel em em identity politics bawk kha a ni lawi a. Minority leh Muslim lamah tan a khawh nasa hle a, a hma pawhin Muslim tamna lamah a che chhe ngai lo reng a. Christian te tih lawm nan pawh inthlan hma chuan sakhaw hmun te tlawhin a buai hle a nih kha; minority te himna hmun ni a WB a puang erawh a lawmawm viau thung. Mahse, chu intihbingna kal vung lutuk chuan hlawm lian tak Hindu te a tan rualtir zawk ta chiah a, tun hmaa vote darh ve tak thin pawh Hindu vrs Muslim angin politics a kal nasa zual a, hei hi TMC tih chhuah, hun rei tak hlawhtling, mahse daih reng bik lo a ni.

Tlipna

Ka thian Journalists leh khu lam politics ngaihven deuhte ka biakrawnna leh ka lo hmuh ve chinah chuan mipui nawlpui vote thlak dan chu tun hma zawnga state police duty tum ai fein a zalen a, mipuiin vote an thlak tak tak tawh tiin min hrilh nghe nghe. A awmzia chu tun hma khan hmun thenkhatah chuan TMC goons lam hian mipui vote thlak tur tam tak an mahni support lo chu an lo dang emaw, an lo vau zam thin a. 2021-ah 82.3% chauh vote a tlak laiin kuminah erawh 92.8% lai vote tlak dan a ni a. Buaina lian tham engmah awm loin inthlan muang taka neih a ni kha a lawmawm hle. Mipuiin change hmuh an duh avanga tling TMC chu change duhna avang bawka paih thlak an ni a, hei hi a ni politics chu, that mar reng loh chuan kan aiawh hi an lo awm vat mai a, tha lo zawk ni a kan ngaihte pawh hmuh that zawk an lo awl viau reng a ni.

West Bengal angah hi chuan sorkar lai an paih thlak hian, a paih thlatu hi rei tawk fang an dingchang duh riau a, an paih thlak tawhte lah an ding chhuak mang tawh ngai lo zui! TMC pawh hi Left ho angin an zuih tial tial ve ang tih a hlauhawm hle. “Ka lo kir leh vat dawn” titu Didi leh a pawlte hi chak lo angah pawh la inngai duh hauh lo mah se, Trump-a inthlan hmasaa a vui ang deuh khan an vui liam ve maithei a ni. Kan thlir zel a ni ang chu.