KRISMAS BAWM

A kawmah ‘KRISMAS BAWM’ tih kan tar a, chu bawmah chuan ni khatah cheng sawm te, cheng nga te kan thlak \hin.

Kan \hianho chu mi dang ang ve bawk kan ni; a tam zawk zirlai kan ni a, thla kipa hlawh la kan awm lo. Kum tina kan Krismas hman dan pawh a danglam tam lem lo; kan inkhawm a, kan zaikhawm a, ar kan kang a, kan tlaivar lek lek fo a, ruai kan theh bawk \hin, dan pangngaiin. Krismas-ah mi dang tana luan chhuah ve duhna a lo awm a, chu chu thil \ha a ni tih kan hria a, thil ropui leh tam tham kan ti thei lo tih kan hre tel nghal bawk. Chutiang chu kan dinhmun a nih avangin kan tih theih awm chhun nia kan hriat KRISMAS BAWM chu kan siam ta a, chu bawmah chuan ni khatah cheng sawm te, cheng nga te kan thlak \hin.

Sik leh sa a inthlak a, hnah hlui hnah tharin a thlak a, kan tleirawl rilru pawnlang leh thawveng pawh thil \ha tih duhna thinlungin a thlak chho ve mek bawk. Kan KRISMAS BAWM chhungah chuan pawisa kan neih ang ang kan thlak ve zel a, mi hausate bank account nen khaikhin ta ila, kan bawm ringawt pawh chu HMUN KHAWHAR a ni nghal; a luah lumtu an \hahnem mawlh lo a ni. Chuti chung chuan chu bawm chhunga pawisa te chu hmun khawhara Krismas nghaktute tana kan serh hran a ni a, pawisa thlak \hin tute chu pek belh ngai kan nih chang a awm zeuh zeuh bawk. Chu bawmah chuan ni khatah cheng sawm te, cheng nga te kan thlak \hin.

Tlaizawng par a vul \an a, favang hun nuam mual liam tur leh thlasik inher chhuak tur an intawk lawi mek. Ni tina kan pawisa khawl chuan kan bawm a la mawi zo lo tih kan hriat avangin inhlawhna kan dap a, kan hlawh chu thil chi hnih atan kan hmang – bawma thlak atan leh chaw ei khawm nan. Mahni deh chhuah sum hlut bikzia kan hre thar a, bawma thlak tur aiin chaw ei khawm nan pawisa kan hmang hnem zawk tih chu kan sawi chhuak lo \heuh a, kan thinlung erawh chuan a vawng reng thung. Hun a kal zel a, chu bawmah chuan ni khatah cheng sawm te, cheng nga te kan thlak \hin.

December Ni 20 a ni a, KRISMAS BAWM hawng turin kan inbuatsaih a, kan pawisa khawl zat hriat kan chakna leh kan huphurhna chu a inchen titih. Tui mal far te tein tuifinriat a siam \hin ang hian, ni khata cheng sawm te, cheng nga te kan thlak thin chuan tuifinriat a lo siam ve a, kan thinlungah RAM NUAM a din nghal bawk. Naupang thawmhnaw leh inawmlemna tur tlem kan lei a, a bak chu pawisa faiin kan dah \ha thung. Tunah chuan dawngtu ni loin petu kan ni ve dawn ta, kan hlim a ni.

Zanah, leng hawn ar an khuan rual velin veng mawng lam kan pan ngar ngar a, PWD kawng kan zawh zo a, ni za inhlawhna hmanga mipui kawng laih kan zawh ral leh \hak a, vantlang khawnvar (street light) hmuh tur awm tawh lo va, kan thlang lawkah chuan bawng in pakhat a ding bawk. Chu bawng in thlen hma deuh chuan in pakhat a awm; chu hmun chu hmun khawhar a ni a, chutah chuan Pathianin Ama anpuia a siam ve bawk ten Krismas an nghak a, chutah chuan kan kal dawn a ni.

Pawn lamah mihring siam chawp êng leh Krismas kaihhnawih thil mawi hmuh tur a awm lo. An in bang dâp, bawh tah hlui tawh tak kar a\ang chuan in chhunga an êng chhit chu a rawn zam chhuak chiai a, an in bang dâp chu hun rei tak an thawm \ha tawh lo tih a hriat theih. An luhka kan chuang kai a, awm hmun kan rem fel a, ‘Aw a va mawi em he ni lawmawm hun tawi te hi’ tih hla sain an muhil tui lai chu kan va \hawng tho ta a ni. Hla kan sa zo va, an nu ber chuan dim tein kawngka a rawn hawng a, chutiang zana \halai rual an luhkaa lo awm \hup mai chu mak tiin min en reng a. A hmelah chuan Krismas lo thleng tur nghakhlel hmel hmuh tur a awm lo; a awm lo mai ni lovin chu hun lo thleng tur chu huphurh takin an thlir mek tih a lang reng mai. An khawsak a harsat em avangin chu ni lawmawm tawi te lo thleng tur chu an tan a mawi zo ve tak tak \hin lo a ni.

“Tute nge in nih a? Ka va hre ngai lo che u ve. Eng nge in rawn tih dawn?”

“Ka pi, \hianho kan nia. Hei Krismas thilpek pe tur cheu in kan lo kal a nih hi”

“A ni maw..! In va ti ropui ve aw, in chhungah lo lut rawh u”

An in chhung chu a tlabal hle mai. Thing leh thira siam thil \ha hmuh tur a awm lo a, chu hmun khawharah chuan mihring mit hmuha mawi leh nalh a awm mawlh lo. A fate chu lei chhuatah an lo mu tlar dal a, an puan sin chuan a tuam lum zo lo ang tih a rin theih. |hutna tur mumal a awm lo a, an \hutthleng awngrawp tawh takah chuan a \hen kan thu a, chuta leng bak chu kan ding mai a.

“Keini \hianho hian Krismas-ah mi dang tana luan chhuah ve kan duh avangin KRISMAS BAWM kan siam a, chutah chuan kan neih ang ang thlakin kumtir a\angin pawisa kan khawl ve a, zaninah Pathianin helai hmunah hian min rawn tir ta a nih hi.”

|awng\aina tawi te kan hman zawhah kan thil ken ang ang te chu kan hlan a. Chu thilpek a dawn ruala nu ber mit a\anga lawmna mittui lo luang chhuak chuan min hneh hle mai. Lawmthu sawi a tum a, engmah a sawi thei lo. Engmah sawi lo mah se a mittui chuan lawmna vawrtawp a lantir a, chu chuan kan zavai mai chuan min vel a, kan insum zo lo. Zan khawharah, hmun khawhar nghaktute hmela lawmna mittui lo luang chhuak chu, aw a va mawi em!

Hei hi ka lo hre ta. A zat ni lovin a petu thinlung a pawimawh a ni, tih hi.