CHAPCHAR KUT ATANGIN ENG NGE ZIR TUR KAN NEIH?

CHAPCHAR KUT CHIBAI U LE

CHAPCHAR KUT ATANGIN ENG NGE ZIR TUR KAN NEIH?

Chapchar Kut:

Mizote kut pui ber tiin kan sawi thin. Pi leh pute Run leh Tiau inkara an awm lai khan tum khat chu khaw pakhat Lal leh a upate chu chapchar lai hian an ram chhuak a. An hlawhchham chiang hle mai a. An lalpa chuan ramchhuakho hrilhhai thawina ni fawmin ran lu kimin Sial, Vawk, Ui leh Ar in a rawp chaw a. A ram chhuahpuite pawh ar a thawhtir vek bawk a. Tichuan nula leh tlangval dangte sawm belhin awm ni an kham ta mup mup mai a ni. An ram chhuah hlawhtlin tum ai mahin an hlim ta zawk hial a. Nu leh paho pawhin rawn zawm vein zu bel puin an lo tawiawm ve a, Inah leng loin, lal mualah an insawn hial a, an lam ta mup mup mai a. Chuta tang chuan kum tin danah neiin kan lo hmang ta ziah a ni.

Chapchar awllen laiin Pasaltha rual an ram chhuak a, an hlawhchham lutuk kha an zak hle a ni ang, an indawm kun a. Khuaa luh a, an chhungte hmachhawn an hreh a ni. A hunlai ngaihtuah chuan a hrehawm turzia kha. Tunlai hunah han chan ta i la; kumpui lingletin hostel ah chhungten lehkha zir turin min dah se, kum tawpah subject zawng zawng maiah han fail vek mai i la! Chutiang vel chu a ni ve thei awm e. Chutianga an indawm kun laia an lal finzia kha, lal nih a tlin a, a khua leh tuite tan Pa nih a tlin tih kan hmu thei a ni. “Naute u, indawm kun mah ta che u, kan dam ang a sa te zawng kah mi a lawm ni ngai. A lehpekah kan heti reng bik awm lo em mai” ti te pawhin a Pasalthate kha a hnem hi ka ring a ni. Tawngkam mai duhtawk lovin, ran lu kimin  a rawp chaw a, chu hun chu chhunzawm zelin, kha indawmkunna atanga lo zi chhuak kut kha hlimna kut ropui tak a lo ni ta a ni.

Kan Zir Tur:

Kan sawi tak ang khian Mizote Kut ropui bera kan chhal ‘Chapchar Kut’ chu hlawhchhamna atanga lo chhuak a ni tih kan hre thei a. Chutiang bawkin Pawl Kut te pawh a ni. Tampui an hmachhawn a, Thingpui Tam avangin Buh kham khawp an thar lo a, Silai pawhin a kaw khat bak Buh a man loh hun an tawng a ni. Chutiang khawpa tampui an tawrh hnuah malsawm kum an thleng a, an hawp khawp aia tam fe mai an thar a, Buh leh Balah malsawmna nasa tak an dawng a, lawm zai an rel ta kha a ni. Mim Kut ni se, Mitthi Pul kut a ni a, chhungte boral ta pualin urhsun taka hman thin a ni a, ‘Tah Kut’ tia sawi te pawh an awm bawk.

Mizote Kut zawng zawng deuhthaw hi a lo chhuahna chu manganna leh lungngaihna an tawrhna atangin a lo ni deuh vek mai! Chu harsatna nasa tak an pal tlang hnua an dawnsawn dan entawntlak tak avangin Kut ropui tak tak keini’n kan lo nei ta a ni. Harsatna leh mangannate hi hringnun tihringnuntu a ni miau a, he khawvelah hian kan ta ve tur a ni tlat si. Kan kawng zawh azir te, kan dinhmun azirin kan harsatna leh malsawm dawnna kawng pawh a hrang theuh awm e. Chu harsatna, hringnunin min pek, inang lo nuai mai chu a chhanna pawh a inang thei lo a, a chin fel dan pawh a hrang thluah thin. Thenawmte tih dan hlawhtlinpui tawk lo awm ve mah se, mi tam zawk tan chuan kan harsatna kha kan koa chunglam nghah, kan chin fel ve tur a ni fo.

Chapchar awllen laia Pasalthate kha tunlai thangtharte hi ni i la, kan zak lutuk ang a, kan beidawngin kan nunna pawh kan hum zo lo mai ang em? Emaw, ram chhuah hi ka ei zawnna tur a ni lo e tiin kan kawng kan thlak sek mai ang em? Nge ni a Thingpui tam avanga tampui tuarho ang lo tak khan kan Sakhaw vawn te kan kalsan ang a, kan lal ngei pawh demin, hruaitu ni tlak a nih lohzia kan sawi luai luai mai ang em? Kan phunchiar viauin ka ring a ni. Kan pi leh pute kha chu an mangan ber lai pawh khan an inhnem tawn a, an indem mai lo va, harsatna an hmachhawn ho thin a ni.

A eng lam an thlir tlat a, an harsatna aiin a lehpeka lo awm tur an thlir a, vanduai reng turah an inruat ngai lo a ni ang, an hlawhchham ber ni lawmin hlim takin an zai thei tlat! Engmah lungkham lo ni se chuan kum tin Chapchar Kut an lawm lo ang a, awllen tih tawngkam hian an nunah awmzia a nei lo ang. An hmabaka tihtur awm an ti a, an thawk a, an chhel em em vek a ni. Chu an thawhrimna avang zawka awllen lai nei an ni a, chu hun chu an sa zawn ve hun a nih avangin an tan hlawhchham a thiang lo. Mahse, an hlawhchham tum pawh khan an indawm kun reng lo thung. An hlawhchham ni lawmin an zai a, an chai a, kha mi kumah khan inthlahdah zuiin, Buh leh bal an thar tlem phah a rinawm loh a ni. Kum tin an hmang zui ta fo hian an thawkrim reng a, an intodelh reng tih a lantir awm e. An hlawhchhamnaa beidawng zui duh lo an nih avanga ‘Hlimna Kut’ nei ve chauh kan ni si a.

Harsatna tuar theuh theuh, hringnun suara leng za theuh theuh keini hian kan harsatna te, kan vanduainate kan hmuh len bik lutuk chuan mahni inkhawngaihna a lo piang a, chu chuan min titlawm vat thin. ‘He harsatna tuar tur hian kei hi ka chak tawk a, kei hi chunglamin min ringtawk a, chunglam khian hei hi ka su tlang thei dawn tih a hria a ni’ tia mahni infuih mawlh mawlh chungin, harsatna karah pawh kan pi leh pute ang khan chhel a, lawmna tur zawn tlat te, hmalam hun a eng zawnga thlir tlattu nih hi a va ringtu zia em aw...