𝐀𝐫𝐠𝐞𝐧𝐭𝐢𝐧𝐚 𝐥𝐞𝐡 𝐄𝐧𝐠𝐥𝐚𝐧𝐝 𝐁𝐮𝐚𝐢𝐧𝐚 𝐅𝐨𝐨𝐭𝐛𝐚𝐥𝐥 𝐏𝐢𝐚𝐡 𝐋𝐚𝐦

𝐀𝐫𝐠𝐞𝐧𝐭𝐢𝐧𝐚 𝐥𝐞𝐡 𝐄𝐧𝐠𝐥𝐚𝐧𝐝 𝐁𝐮𝐚𝐢𝐧𝐚 𝐅𝐨𝐨𝐭𝐛𝐚𝐥𝐥 𝐏𝐢𝐚𝐡 𝐋𝐚𝐦

Zanin lama inkhel tur an nih vang ni maw, kan zirlai hlui pakhatin Argentina leh England inhuat/boruak san bik thin riau chhan mi rawn zawt nawlh a. Ka chhanna thenkhat chu a thui tham deuh si a, helamah ka han dah tel ang e.

Football hi a tichhuaktu tak sawi bik theih ni lo mah se, hmanlai Han Dynasty hunah te, Ancient Greece, Rome leh Italy lamah te ball hmanga infiamna hi an lo nei tawh tih kan hre theuh awm e. Hun a kal zel a, kum tel chu Sapho hian "Mob Football" emaw "Shrovetide" tiin an khel thin a. Dan leh dun awm hek lo, mi za tel ten vawi khatah khelin, khaw inhal leh inngeih lo deuhte chu an phek buai chiam fo a. King Edward II khan mipui tibuai zawnga khelh a khap hial a ni.

Kum 1863-ah Football Association lo piang tain, Ebenezer Cobb Morley chuan an dan leh dun pawm felte a final pui a, tunlai Football dan tam zawk hi a lo piang ta tiin tawi fel takin kan dah thei awm e.

Chutianga Modern Football ta neih deuh bertu chu English an nih deuh tak avangin, khawvel hmun dang danga football theh darhtu pawh an ni zui ta zel a. Scottish school teacher Alexander Watson Hutton chu "father of Argentine football" tia hriat a ni daih nghe nghe. A chhan pawh Argentina rama Football league mumal din hmasatu leh Association te dintu a ni a, awmze neiin a zarah an kal chho a ni. Chutianga an Father of Football pawh Mi-Ngo pa tho a nih avang chuan eng emaw zawng tak chuan an inkar hi a lai deuh hu a, mahse, an ram hruaitu ten an sawi angin railway an hnam thila an seng lut thiam angin, football pawh Argentina ram ta ang maiin an seng lut thiam a tih kha a dik viau lawi si.

𝐀𝐧 𝐁𝐮𝐚𝐢𝐧𝐚𝐭𝐞 𝐜𝐡𝐮

1966 World Cup quarter final-a England leh Argentina insut khan Argentina Captain Antonio Rattin kha West Germany referee Rudolf Kreiein khan a hnawt chhuak kha a ni bawk a. Khata a hnawh chhuah dan lah kha tawng inhriat pawh tawn loh vang leh, Rattin chet dan kha a mawihnai lo deuhin referee khan a hre bawk a. Tichuan a chhuak duh lawk lo nghe nghe, match zawhah England coach phei chuan players jersey inthleng a remti lo a, ramsa ang maiin Argentina te kha a sawi zui nghe nghe bawk. Argentina lam chuan hei hi "The Theft of the Century" an ti hial ve thung.

Falklands War 1982 kha buaina emaw Falklands Politics hi a lian ber pawl chu a ni awm e. British Oversea Territory - Falkland Island chu Argentina military lamin April ni 2, 1983 khan an bei thut a. Khata British lamin April ni 5 a an tui chung sipai leh boruak sipaite hmanga an do letna avang khan an inhaw hle kha a ni. Ni 74 an indo a, Argentina lam an tlawm zui ta a ni.

Round of 16-a Egypt an hneh tuma Argentina fans te hla sak duh pawh, "For the Malvinas (Falklands), for Diego (Maradona), for Leo (Messi)'s last one," tih kha a la ni rem mai a. Chuvangin Falklands politics hi hemite inkarah chuan thuk taka a za lai dektu ber chu a ni kan ti lo thei lo ang.

A lian ber pakhat leh Falklands War chhunzawmna tho chu "The Hand of God" an tih, 1986 World Cup quarter final (Falklands War atanga kum 4 na lekah) Maradona khan a kut hmanga a tih goal kha England lam rilru a na ve hle bawk a. Argentina lamin an Indo phuba lakna tiin an ngai a, England tan erawh an Manager sawi angin "The Hand of a Rascal" zawk a ni ve tlat bawk, Hand of God ni loin… Maradona pawhin inkhelh hma leh zawh hlimah chuan Football match pakhat mai anga an en thu sawi mah se, a Autobiography "Yo Soy El Diego (I am the Diego)" buah chuan Argentina mi leh sate sava ang leka an thah nasatzia an hriat reng thu leh phuba lakna dik tak tiin a ziak thung!

A hnu lam Beckham red card hmuh chungchang te, FIFA election dawna tawngkam hrang hrangte pawh a awm nual a, mahse Falklands Island/Islas Malvinas hi tun thlenga NATO leh Trump buaina ber a ni mek zel a nih hi.

Argentina President Javier Milei berin tawpsan tum loin a bei zel a, mahse tharum leh innek zawng loin fing taka lak let ngei a tum thing. US lam hian UK hi hun rei tak a lo thlawp bawk a, chuvang chuan UK pawh a huaiin, a tawng chhan ber pawh a ni ve thin. Mahse, tun hnaia Middle East lama US (Trump) chetna hrang hrangah UK lamin an thlawp that duh tak loh avangin White House lam chuan an tihtauhsan leh mek tawh a, UK lam erawh an la tawng huai ve hle thung.

Kum 2013 khan voters 1517 (92%) in vote thlakin 99.8% chuan UK Overseas Territory nih reng an la duh tlat mai a, mahse, Argentina lam erawhin Colonial power hmanga ram mipui tam zawkte hi lak luh chawp an ni a, chuvangin Argentina tan chuan kan ram bung pakhat an ni reng a, mahnia ro inrel lam pawh a remchang lo an ti mauh mai a. UN lam chuan self determination lam awn thin mah se, Argentina hian Territorial Integrity tanchhanin an bei ve ngar ngar mek thung, engtin ti zel ang maw le.

Eng pawh ni se, Zanin chu a hmuhnawm dawn - a piah lam thawmvang pawh a ngaihnawm leh hle ngei ang le.